【亞運2018】亞運港隊回港大叔不滿被擋路　出言侮辱：特登飛過去包尾仲咁開心

「香港運動員唔係垃圾」！今屆雅加達亞運會，港隊再創佳績，昨晚凱旋歸來獲不少支持者和記者包圍，場面一度混亂，有市民因不滿運動員接受訪問阻礙其直線推車去廁所的道路，出言悔辱：「特登飛過去包尾仲咁開心，都唔知班人諗乜！」目擊者Conrad Wu在fb專頁「CALL4VAN 客貨車」帖文，以《香港嘅運動員唔係垃圾，但香港人係垃圾都不如》，批評出言侮辱者看不起香港運動員，是垃圾都不如的香港人。

原文獲版主授權節錄如下：

我從來冇試過見一個人三秒就有衝動想打X佢，今晚係第一次。

今晚國泰CX776返港航班，大半係出戰亞運嘅香港運動員、教練、隨隊人員，我雖然只係觀眾，但同一班機，與有榮焉。

機艙入面，坐喺我隔籬嘅係年僅18歲嘅游泳代表廖先浩，落機之後仲同歐鎧淳排隊過關，禮貌上恭喜佢之後，佢仲好有心噉指畀我睇佢嘅隊友喺隔籬排緊，雖然佢唔會知道我係邊個，但我真心覺得，有佢哋，I am proud to be a Hongkonger。

出閘之後，有大批記者、家人同支持者守候，場面的確係有少少混亂同擠擁嘅，然後係人群入面，我聽到一句說話：

特登飛過去包尾仲咁開心，都唔知班人諗乜！

圖中呢件垃圾，原來就係因為運動員做訪問阻住直線推車過去廁所，佢大可以兜少少路走、講句唔該借借、甚至出聲話你哋阻住晒條路。但究竟呢件垃圾內心有幾睇唔起香港運動員，先至講出呢句咁難聽、咁侮辱嘅說話？

Conrad Wu在文尾提到，22年前，(風帆皇后)李麗珊奧運奪金後說了一句「香港運動員唔係垃圾」，背後原因是金錢掛帥的香港，很多人由心看不起運動員，覺得做運動員無出色、無錢途。

到今時今日2018年，我以為主流睇法已經唔同咗，但其實係咪只係我一廂情願？香港嘅運動員從來都唔係垃圾，但香港究竟有幾多呢啲垃圾？

記者：勞佩欣